Rodriguezek 2010eko uztailean salatu zuen torturatu egin zutela, Donostiako epaitegi batean. Handik, Madrilgo Probintzia Auzitegira bideratu zuten auzia, baina, diligentzia batzuk egin ostean, artxibatu egin zuten salaketa. Orain, erabaki hura baliorik gabe utzi du Espainiako Auzitegi Konstituzionalak, eta Rodriguezen auzia berriz ikertzeko agindu dio Madrilgo 29. instrukzio auzitegiari. Uztailekoa da epaileen erabakia, baina herenegun publikatu zuten BOE Espainiako aldizkari ofizialean.
Ikerketa ez zen egin modu "zehatz eta eraginkorrean", epaileen arabera. "Ikerketa garaiz hasiagatik eta zenbait eduki izanagatik ere, itxi egin zen, oraindik instrukziorako bitartekoak edukirik ere".
40 gazteen auzia
2009ko azaroan atxilotu zuten Rodriguez, Segiren aurkako sarekada batean. Espainiako Auzitegi Nazionalean epaitu zuten, 40 gazteen auzian: absolbitu egin zituzten denak. Absoluzio epaian, torturarekin lotutako hainbat puntu nabarmendu zituzten epaileek; besteak beste, azaldu zuten Italian eta Ipar Euskal Herrian atxilotutako guztiek heldu zietela beren buruaren aurka ez deklaratzeko eskubideari, eta Espainiako Poliziak atxilotuetakoetik 22k deklaratu zutela beren buruaren aurka. Torturak salatu zituzten haiek guztiek.
Garazi Rodriguez antifaza jantzita eduki zutela ere aipatu zuten epaian Auzitegi Nazionaleko epaileek, Espainiako egunkari batean atera zuten argazkia erabilita. «Zentzumenak murriztea nazioarteko torturaren metodoak ikertzeko eta dokumentatzeko eskuliburuan jasoa dago, pertsona desorientatzen duelako eta bakartzea larriagotu».
