Astelehenean, Iruñean, PSNren egoitzaren aurrean torturaren aurka egitekoa zen elkarretaratzea debekatu du Espainiako Gobernuaren ordezkaritzak. Torturaren Kontrako Gurasoak mugimenduak atzo eskatu zuen elkarretaratzea egiteko baimena. Ekimena lau egun barru egingo zenez, "premiazko" elkarretaratzea zela adierazi zuten.
Gobernuak, baina, ukatu egin du ekimen hori "premiazkoa" dela; eta hilak 28 eta apirilak 11 artean antzeko beste hiru eskaera gehiago egin direla jakinarazi du. Horregatik, elkarretaratzeak egiteko eskaerak, gutxienez hamar egun lehenago egin behar direla argudiatuta, torturaren kontrako ekimena debekatzea erabaki du gobernuaren delegazioak.
Torturaren kontrako gurasoak taldeak ez ditu gobernuaren argudioak onartu, baina. Haien aburuz, "gobernuaren ordezkariak legea bere mesedetan bihurritu du, PSOEren kontra doazen elkarretaratzeak debekatzeko". Sainzen gobernuak gizartea "isilarazi" nahi duela gaineratu dute. Atxilotuek torturak "behin eta berriz" salatzen dituztela nabarmendu dute, eta debekua Giza Eskubideen urraketaren "salaketa ekiditeko" erabili dutela ohartarazi dute.
