Amurrioko Tubos Reunidos enpresak akordio bat sinatu du Marubeni-Itochu Steel Japoniako enpresaren Europako filialarekin. Elkarrekin Araban planta bat irekitzea biltzen du hitzarmenak; 80 langile izango ditu, eta petrolioa eta gasa zulatzeko materialak ekoitziko dituzte.
Horrela, arlo horretan dagoen eskariari erantzun nahi diote; Tubos Reunidosen arabera, Afrikan eta Erdialdeko Ekialdean hazi da gehienbat eskaria. Espero dute ekoizpena 2016an hastea.
Enpresa berri horren %51 egongo da Tubos Reunidosen esku, eta gainerakoa Marubeni-Itochu Tubulars
Europe-rena izango da (%49). Marubeni-Itochu Japoniako enpresak 9.500 langile inguru ditu.
