Amnistiaren Aldeko eta Errepresioaren Aurkako Mugimenduak jakinarazi duenez, Huelvako espetxean (Espainia) dauden euskal presoek —ez du zehaztu zeintzuk— txandakako gose greba hasi zuten atzo, abuztuak 18. Aste bakoitzean preso batek egingo du baraualdia. Asteon, Iker Olabarrieta Fiñu ari da.
AEMk azaldu duenez, “borrokaldiaren” helburua da gaixo dauden presoen askatasuna galdegitea eta, “batez ere, herria [preso] hauen askatasunaren alde mobilizatzeko beharraz kontzientziatzea, ezbehar bat gertatu baino lehen”. AEMren arabera, Huelvako presoek azpimarratu dute “benetako borroka” kalean eman beharrekoa dela eta “soilik herriaren presioa eta indarraren bitartez” izango dela posible helburu hori gauzatzea.
Talde horrek bere babes osoa adierazi die Huelvako euskal presoei eta bide horretan “konpromiso berriak” hartzen jarraitzeko prest agertu da. Gogoratu du, halaber, berriki Aitzol Gogorza presoak sei egun egin dituela gose greban —gaur astebete utzi zuen—, Etxarri Aranatzeko “solidarioek” bosgarren eguna bete dutela gose greba mugagabean eta Valenceko espetxeko (Frantzia) presoak ere “borrokaldia” egiten ari direla. Haiei elkartasuna agertzeko, 56 lagun elkartu ziren atzo Frantziako Estatuak Bilbon duen kontsuletxean.
