Bilboko tranbian bidaiariek erabili ohi duten Barik txartelarekin batera, Gipuzkoako Mugi eta Arabako Bat txartelak ere erabil daitezke gaurtik aurrera. San Mamesko geltokian aurkeztu dute, eta, Antonio Aiz Eusko Jaurlaritzako Garraio sailburuordeak esan duenez, "lehen pausoa" izan da txartel bakarra gainerako lurraldeetara zabaltzen hastea.
Asmoa da udazkenerako sistema bateratua Gasteizko tranbian martxan jartzea, eta aurrerago Donostiako hiri autobusetan —oraindik zehaztu gabe dago noiz—.
Aizek gogorarazi du txartel bakarraren asmoa "hiru lurraldeetako herritarrak batzea" dela eta, aldi berean, garraio publikoa sustatzea. "Lehen probak gainditzen direnean, sistema zabalduz joango da garraio sistema publiko osora; tranbietan, autobusetan eta trenetan egongo da", esan du.
