Festetan txosnetan «eraso eta mehatxu faxistak» jasan dituztela salatu dute 150 bat herritarrek Leitzan (Nafarroa), hango Txosna Batzordeak antolatutako elkarretaratzean. Faxismoari stop leloa zeraman pankartaren atzean bildu dira arratsaldean.
Txosna Batzordeak azaldu duenez, abuztuaren 9an jaso zuten lehen erasoa, festak hastear zirela. Muerte a los terroristas [«heriotza terroristei»] mezua agertu zen txosna batean idatzita, eta pintura gorria ere jaurti zuten. Festetan ez zen halako beste gertakaririk jazo, baina abuztuaren 15eko gauean, beste mezu bat agertu zen, oraingoan zehazki herritar bati zuzendutako mehatxuekin.
Leitzako Txozna Batzordearen mezua pairatutako gertakarien harira. #FaxismoariSTOP#GoraEuskalHerriaAntifaxistapic.twitter.com/Xi205p2tR2
— Leitzako Txoznak (@LeitzakoTxoznak) August 17, 2022
Mehatxua jaso duen herritarrari eta haren familiari babesa agertzeaz gain, «Euskal Herriari hainbestetan eraso dion eta erasoan jarraitzen duen faxismo espainiarra» salatu dute: «Guk argi dugu ez dugula eraso faxistarik onartuko, eta horrelakoak berriro gerta ez daitezen borrokan jarraituko dugula».