Asteazkenean hasiko dira sanferminak Iruñean, eta Bilduk gaur txupinazoaren ekitaldira ikurrina eramateko eskubidea errespetatua izateko eskatu dio udalari. Azken urteetan udaltzainak plazako sarreretan aritzen dira ikurrinak kentzen, eta iaz istilu larriak izan ziren, plaza jendez beteta zegoenean indarrez sartu eta ikurrina handi bat kendu zutenean. Istilu horien harira, epaiketa egin berri da Iruñean, hainbat gazte auzipetu zituztelako.
Martin Garitano Gipuzkoako ahaldun nagusia txupinazoan udaletxean izango dela iragarri du Bilduk. Gainera, errespetua esparru guztietara eramateko deia ere luzatu die herritarrei, eta genero indarkeriari aipamena eginez, ezetz ezetz dela azpimarratu dute. Gainera, Astelehen Lilak kolektiboarekin bat egin du, eta uztailaren 7an Nagore Laffage gogoan izateko ekitaldi bat egitearen alde agertu da.
