Hizkuntza Eskubideen Behatokiak euskararen telefonoa doako zerbitzua eskaintzen du. "Hizkuntza eskubideen urraketei konponbidea emateko tresna zuzen eta eraginkorra" izatea da xedea, eta Euskal Herriko edozein herritarren eta elkarteren eskura dago. Edozein pertsonak du aukera bere kexa bidaltzeko, euskara urratua izan dela pentsatuz gero.
Bi entitateek elkarren artean aitzina eramanen duten lanari esker, Udalbiltzak "udaletara igorriko ditu biltzen dituen kexak, udal arloari badagozkio". Euskal Herriko Garapen eta Kohesio Funtsak 10.000 euro emango dizkio Euskararen Gizarte Erakundearen Kontseiluari, lana Hizkuntza Eskubideen Behatokiaren bidez gauzatu ahal izateko.
Behatokiak, urtero, hizkuntza eskubideen egoeraren diagnostikoa egiten duen txosten bat egiten du, eta bertan herritarren euskararen telefonoaren bidez egindako kexak barnebiltzen dira. 2013. urtean, adibidez, Behatokian 200 kexa bildu zituzten, eta, Ipar Euskal Herriari dagokionez, nabarmendu zuten Frantziako Estatuak politika "erabat" baztertzailea eramaten segitzen zuela frantsesa ez den hizkuntzekiko, ondorioz euskararekiko.
Behatokiak 2013ko txosten hori aurkeztu dio Udalbiltzari, "toki administrazioei dagokienez 2013an jasotako kexak biltzen dituena eta udaletan herritarren hizkuntza eskubideak bermatzerakoan antzemandako gabeziak adierazten dituena". Gaineratu du txostena "lan tresna garratzitsu" bat dela udal hautetsientzat, tokiko administrazioan euskararen normalizazioaren aldeko lana aurrera eraman ahal izateko.
