Larunbatean egingo du Uemak urteko bigarren batzar nagusia, Zestoan, eta, hori baliatuta, bi kide berri onartuko ditu Udalerri Euskaldunen Mankomunitateak: Gabiria (Gipuzkoa) eta Igorre (Bizkaia). Lehenak joan den otsailean iragarri zuen Ueman sartzeko asmoa, eta bigarrenak, berriz, atzo bertan, udalbatzaren osoko bilkuran.
Bi kide berriak gehituta, 245.000 biztanleko eremu euskalduna osatuko dute Uemako kide diren 84 herrien artean. Agintaldi honen hasieran, 72 udal ziren mankomunitateko kide. Azken bi urteotan, berriz, 11 herri gehiagok erabaki dute Ueman sartzea: Dimak, Eak, Ziortza-Bolibarrek, Legorretak, Areatzak, Larrabetzuk, Ataunek, Mendarok, Errezilek eta larunbat honetatik aurrera kide izango diren Gabiriak eta Igorrek.
