UEMA Udalerri Euskaldunen Mankomunitateko kide izatea erabaki du Azkoitiko Udalak, arratsaldean egindako abenduko udal osoko bilkuran. Udalbatza osatzen duten hamazazpi zinegotzietatik hamaseik egin dute horren alde; EAJren, EH Bilduren eta Azkoitia Bairen aldeko botoekin. Kontrako botoa eman du PSEren zinegotziak.
Azkoitiak ez ezik, azken asteotan Zeanurik, Mendexak (Bizkaia), Berrobik, Hondarribiak eta Lezok (Gipuzkoa) ere erabaki dute UEMAn sartzea. Hain justu, etzi egingo du UEMAk batzar nagusia, Orion, eta orduan onetsiko dituzte sei herri horien eskaerak. Horiek guztiak onartuta, denera 107 herri izango dira UEMAko parte, eta guztien artean 342.000 biztanleko lurgune euskalduna osatuko dute.