Egunak behar izan dira gertatua azalera ateratzeko. Larunbatean, gizon batek larrialdi zerbitzuetara deitu zuen Uharteko bere etxetik, abisatzeko emaztea dutxan erori zela eta konortea galdu zuela.
Larrialdi zerbitzuak ez ezik, poliziak ere bertaratu ziren Uhartera, Zarraondoa kalera, eta ikusi zuten emakumeak kolpeka egin ohi diren zauriak zituela; haren senarrak ere, dei egin zuen gizonak, zauri batzuk zituela sumatu zuten.
Erizainek eta medikuek Nafarroako Ospitale Gunera eraman zuten emakumea, 38 urtekoa. Larri egon da bi egunez, eta astelehen arratsaldean hil zen, gaur jakinarazi dutenez.
Bitartean, indarkeria matxistaren kasu bat izan zitekeela susmatuta, Foruzaingoa ikertzen hasi zen. Galdeketa batzuk egin, eta, azkenean, preso hartu zuten gizona, 41 urtekoa. Ikertzen jarraitu dute, eta gaur Agoizko auzitegira eramatekoa zuten atxilotua, Emakumeen Aurkako Indarkeriaren 1. Epaitegira.
Foruzaingoak berak jakinarazi du ikerketaren arabera gizonak maiz ematen zizkiola tratu txarrak emazteari. Foruzaingoaren ikerketa oinarritzat hartuta, bermerik gabeko behin-behineko kartzelaldia ezarri dio Agoizko 2 zenbakiko instrukzio epaitegiak senarrari, giza hilketa delitu bat leporatuta.
Emakume bati eraso egin diote Gasteizen
Poliziek beste gizon bat atxilotu dute gaur, 42 urtekoa, indarkeria matxista egotzita. Gasteizen izan da. Bizi ziren etxean bertan, gizonak eraso egin dio bikotekide zuen emakumeari, eta gero bere burua bota du balkoitik, lehen solairutik.
Beste pertsona batek eman die abisua ertzainei, builak eta kolpeak aditzen ari zelako. Poliziak bertaratu direnean, 42 urteko gizona kalean aurkitu dute, lurrean, hanketan zauriak egin dituelako bere burua balkoitik bota duenean.
Ertzainak etxera igo dira, eta odoletan aurkitu dute emakumea; buruan eta bularrean zituen zauriak, eta jakinarazi du gizonak labanaz eta botila batekin eraso diola. Larrialdi zerbitzuek Txagorritxuko ospitalera eraman dute, artatzeko. Ertzaintzak azaldu du emakumeak berak salaketa jarri duela gero.
Gizona, berriz, Santiagoko erietxera eraman dute. Hanka bat apurtu du erorikoan. Ertzaintzak atxilotuta dauka, han bertan.
