Gipuzkoako Foru Aldundiak Ulia-Jaizkibel itsas eremua babesteko eskatu du. Berrikuntza, Turismo eta Landa Garapen Departamenduak eta Ingurumen eta Lurralde Antolamendu Departamenduak egindako proposamena onartu du horrela.
Ulia-Jaizkibel babesgune bereziaren aurreko itsas eremua babesteko, Natura 2000 Sarean sartzeko eskaera egin du kontseiluak. 13.000 hektarea itsas erreserba bihurtzea ere eskatu du.
Horrez gain, Lapurdi eta Gipuzkoaren artean 300 kilometro koadroko itsas korridorea sortzearen aldeko jarrera agertu du aldundiak, "babestutako itsas eremuak elkar konektatuta egon daitezen".
Diputatuen Kontseiluan lortutako akordioaren bidez, aldundiak "ingurumen ondarea zaintzeko konpromisoa" berretsi du.
