Nafarroako Gobernuko Hezkuntza Saileko UPN, PSN, Nafarroa Bai, Bildu, PP eta Ezkerrako parlamentariak Lodosan izan ziren atzo, Ibaialde ikastolaren egoera bertatik bertara ezagutzeko. 17:15ean heldu ziren, Ana Mendizabal ikastolako lehendakariarekin eta Iñigo Telleria zuzendariarekin eraikinean bisita bat egin zuten, eta ondoren bilera bati ekin zioten. NaBai, Bildu eta Ezkerrak eskatu zuten legebiltzarkideek bisita egiteko.
Lodosako ikastola duela 25 urte sortu zuten, eta egun egoera ekonomiko zailean da. Otsailaren 5ean, irakasleak lau hilabetez soldata jaso gabe zeudelako, ikastolaren aldeko elkartasun festa egin zuten Sartagudan, dirua batzeko. Eguraldiak lagundu ez arren, uneko egoerari buelta ematea lortu dute, eta gaur-gaurkoz ordainduak dizkiete soldatak. Hala ere, hurrena berriz arazo berarekin egon daitezkeela esan dio Mendizabalek BERRIAri. "Egoera gardentasunez erakutsi nahi diegu legebiltzakideei".
Lodosa Nafarroako eremu ez-euskaldunean dago, eta euskara ez da ofiziala han. Gainera, Eusko Jaurlaritzak 2009z geroztik ez die diru laguntzarik eman, gobernuan PSE-EE denetik.
Aitziber Sarasola Bilduko parlamentarioak azaldu du espero duela Nafarroako Gobernuak —UPN-PSN— Lodosako ikastolaren egoera ezagutzea bisitarekin, eta esan du arazoa herrialdeko hizkuntz politikak sortzen duela. Nekane Perez NaBaikoak adierazi du ez daukala itxaropenik bisitarekin.
Ikastolak bost ikaslerekin ekin zion bideari orain dela mende laurden bat. Egun, 74 ditu. Bederatzi irakaslek eta idazkari batek osatzen dute lan taldea.
