Okerrirk ezean, UPN eta PP elkarrekin aurkeztuko dira azaroaren 20an Espainiako Legebiltzarreko hauteskundeetara. Bi alderdiek urteetan izan duten elkarlana berreskuratu dute gaur goizean Yolanda Barcina Nafarroako presidenteak eta Mariano Rajoy PPko hautagaiak.
Aurreakordioa lortuta, bi alderdietako zuzendaritzek onartzea falta da. Ez da espero, ordea, inolako eragozpenik. UPNko zuzendaritzak astelehenean baimendu zuen Barcina PPrekin elkarrizketak hasteko, eta presidentearekin batera, Alberto Catalan presidenteordeak eta Carlos Garcia alderdiko idazkariak ere parte hartu dute.
PPren aldetik Santiago Cervera Nafarroako PPko presidenteak ere parte hartu du, eta berak iragarri du aurreakordioa twitter sare sozialean.
