Bizkaiko Uribe Kostako 11 gazte epaitzen hasi dira gaur Espainiako Auzitegi Nazionalean, 2004-2007 artean kale erasoetan parte hartzea eta ETAko kide izatea egotzita, eta gazteek adierazi dute ez direla etakideak eta ez dituzte kale erasoak egin.
Zazpi eta hamalau urte arteko espetxe eskaerak dituzte aurrean. Guztira 128 urteko kartzela zigorra eskatu du fiskalak akusatuentzat, duela lau urte atxilotu zituztenean polizien aurrean beren buruak erruduntzat joz egin zituzten deklarazioak froga bakartzat hartuta.
Bai auzipetuen bai Eleak mugimenduaren esanetan, gazteen aurkako beste epaiketa politiko soil bat da auzia. Auzipetuek beraiek publikoki salatu dute poliziek nahi zutena esanarazi zietela polizia etxean, atxiloaldian inkomunikatuta zeuzkatela egin zizkieten torturak jasan ezinik; orain epaiketa egiteko froga bihurtu dira adierazpen horiek. 2007ko urrian izan zen gazteen aurkako polizia operazioa, Baltasar Garzon epailearen aginduz.
Bihar eta etzi ere izango dira auzi saioak.
