Carlos Urkijo Espainiako Gobernuaren EAEko ordezkariak Auzitegi Nazionaleko fiskaltzari ohartarazi dio EH Bilduk abenduaren 20rako aurkeztu dituen hautagai batzuk euskal preso ohiak direla eta, ondorioz, ezingo luketela Espainiako bozetako hautagaitzetan egon. "Erakunde armatuko kide edo laguntzaile izateagatik zigortu zituzten, eta baliteke inhabilitazioa ere jasotzea. Hala bada, hautagai haiek ez lukete izango sufragio pasiborako eskubiderik eta, beraz, ezingo lirateke datozen bozetan hautagai izan".
Urkijok gobernuari eskatu dio estatuko hauteskunde legea betetzen ez dutenak hautagai ez izateko neurriak har ditzala. "Guztiok dugu hauteskunde prozesuetan parte hartzeko eskubidea, baina joko arauak errespetatu behar ditugu". Haren arabera, ETAk Espainiako Estatuko "demokrazia bukatu" nahi izan du, eta erakunde armatuko kide edo laguntzaileak ezin dira hautagai izan. "Demokrazian denak ez du balio".
Gobernuaren EAEko ordezkariaren ustez, gainera, hautagai haiek ez dute ETAren "terrorismoa" gaitzetsi eta ez dira indarkeria erabili izanaz damutu.
