Maiatzaren 9an bukatzen da Espainiako Gobernuak izurria kontrolatze aldera neurriak hartzeko ezarritako alarma egoera, eta Espainiako Gobernuko presidente Pedro Sanchezi bidalitako gutun baten bidez luzatzeko eskatu dio Eusko Jaurlaritzako lehendakari Iñigo Urkulluk. Lehendik ere Jaurlaritzako beste hainbat buruzagirekin batera adierazia zuen mezu hori bera, eta eskabide ofiziala egin nahi izan du orain Urkulluk eskutitz horren bidez. Adierazi dio Espainiako Gobernuko presidenteari gainerakoan gobernu autonomikoek ez dutela izango «berme juridikorik» izurriaren kontrolerako beharrezkoak diren murrizketak ezartzeko.
Lehendakaritzako informazio iturriek azaldu dutenez, Urkulluk gutunari erantsi dio Araba, Bizkai eta Gipuzkoarako murrizketak ebazten dituen batzordeko adituek atzo onartutako ebazpena; bertan jartzen du ez dela "egokia" alarma egoera bertan behera uztea, «eraginkorrak» diren hainbat neurri ezartzeko erarik gabe geratuko baitira erakundeak.
Atzo bide eman zioten Eusko Legebiltzarrean izurriaren aurkako legea tramitatzeari. EAJ eta PSE-EE ari dira lege hori sustatzen; oposizioa aurka dago. Premiazko bidetik tramitatuko dute legea, eta, beraz, ohiko prozedurarako ezarritako epeak erdira murriztuko dira. Parlamentuko bilkuraldia amaitu baino lehen legea onartzea nahi dute, ekainean. Bitartean, ordea, maiatzaren 9an alarma egoera bertan behera geratzen bada, hainbat astetan neurriak ezartzeko muga handiak egon daitezkeela esaten ari dira Eusko Jaurlaritzako buruzagiak.
Nafarroako Gobernuko presidente Maria Txibitek, bestalde, esan du oraindik «egun asko geratzen» direla maiatzaren 9rako eta hortik aurrera hartu beharko diren neurriak aurreratzeko.
