Iñigo Urkullu EAJko Euzkadi Buru Batzarreko presidenteak uste du Mariano Raxoi PPko buruak euskal presoak Euskal Herriko kartzeletara gerturatuko dituela, betiere Espainiako gobernuburu bada, "baina denbora pixka bat beharko du gai hori PPn kudeatzeko".
Urkulluk, elconfidencial.com-i emandako elkarrizketan, aitortu du PPrekin bilera batzuk egin dituela, PSOErekin eta ezker abertzalearekin ere bildu dela esan du, baina ETAk borroka armatua bukatu duela iragarri ondotik Raxoirekin ez dela egon jakinarazi du. "Raxoik badaki eskura naukala egoeraren balorazioa egiteko".
EBBko buruaren arabera, PPko presidentegaia "iraganeko muturreko diskurtsoek lotuta" dute, "eta orain alderdi barruan ikustarazi beharko du indarkeriaren behin betiko bukaeraren garaian gaudela eta aurrera egiteko PPk parte hartu beharra duela".
Urkulluk berretsi du presoen arloan pausoak eman behar direla, baina argitu du berak ez duela amnistiaz edo indultoaz hitz egin. "Gerturatzeaz, preso gaixoak askatzeaz eta salbuespen egoerak bukatzeaz hitz egin dut".
