Iñigo Urkulluren gobernuak egindako politikarekin bi urte "galdu" direla uste du EH Bilduk. Koalizioaren iritziz, "lidergo gabe eta alternatiba erreal gabe" aritu da gobernua funtsezkotzat jotzen dituen hiru ardatzetan: bakegintzan, erabakitzeko eskubidean eta alor sozioekonomikoan.
Bi urteko balantzea egin du EH Bilduk. Salatu duenez, Urkulluk "gauza asko" agintzen dizkio gizarteari, "baina ez du egiten". Gainera, uste du Urkulluk —eta Mariano Rajoy Espainiako gobernuburuak— herritarrei "sinetsarazi" nahi dietela egoera onera aldatzen ari dela; errealitatea, ordea, bestelakoa dela dio koalizioak: "Aberatsen eta pobreen arteko lubakia gero eta zabalagoa da".
Gorka Maneiro UPDko bozeramailea ere mintzatu da Urkulluren jardunaz. Haren ustetan, Jaurlaritzak erakutsi du ez dela "gai" izan krisiari aurre egiteko, eta "koldarra" izan da autogobernurako duen proposamena "ez argitzeagatik".
Maneiroren arabera, EAJk "porrot egin du erabat". Esan duenez, bi urtetan pobrezia "areagotu" egin da, baita "desberdintasunak eta prekarietatea" ere. Horrez gain, uste du ez diela "erantzun" herritarren behar sozialei.
