Etxerat elkarteak kanpaina berria abiatuko du datozen hilabeteetan urrunketa politikak adindun eta gaixorik dauden senideengan dituen ondorioen berri emateko. Elkarteak joan den urtean abiatutako Dispertsioaren hegiak izeneko egitasmoaren bigarren atala izango da kanpaina berria–sakabanaketaren eta haurren ingurukoa izan zen lehena–. Etxerat-ek gaur Bilbon jakitera eman duenez, euskal presoen guraso gehienek 70 urte baino gehiago dituzte, eta antzeko egoeran daude osaba-izebak eta aiton-amonak ere. Horietako gehienak 10 eta 30 urte bitartean daramatzate espetxeetarako bidai «luze» eta «garestiak» egiten. Zahartzearen eta bidai luze horien eraginez jasandako «higadurak» mugatu egiten die bidaiatzeko duten grina, eta denei heltzen zaie espetxean duten senidea bisitatzeari uko egiteko ordua, Etxerat-ek gaur jakinarazi duenez.
Errealitate hori txosten batean jaso du elkarteak, eta martxoaren hasieran hasiko da horren berri ematen Euskal Herriko auzo eta herrietan. Horretarako hitzaldi sorta antolatuko du. Txostenarekin batera, lekukotasunak jasotzen dituen bideo bat ere zabalduko du Etxerat-ek.
