Euskal Y-ak Gipuzkoako, Bizkaiko eta Arabako hiriburuetara izan beharreko sarbideaz bilera dute arratsaldean Julio Gomez-Pomar Espainiako Azpiegitura, Garraio eta Etxebizitzako estatu idazkariak, Ana Oregi Eusko Jaurlaritzako Lurralde Politikarako sailburuak eta Gorka Urtaran, Eneko Goia eta Juan Maria Aburto Gasteiz, Donostia eta Bilboko alkateek.
Gomez-Pomarrek bileraren ostean egin ditu adierazpenak: "Martxan dauden obrak ikuskatu ditugu; ondo doaz. Giro baikorra, zintzoa eta errealista izan da bileran". Sarbideei dagokienez, proiektuak erkatu dituztela azaldu du. Oregik ontzat jo du ministerioak adostasunera heltzeko azaldutako interesa.
