Ustezko 11 etakideren kontrako epaiketa hasiko da gaur

Frantziako Auzitegi Berezian hamaika ustezko ETAkideren kontrako epaiketa hasiko da gaur, Parisen. Iñaki Esparza Luri eta haren emazte Laurence Guimon, Ismael Berasategi, Juan Miguel Ilarramendi Zabaleta, Jose Candido Sagartzazu Gomez, Claude Recart, Mikel Uzkudun Lizalur, Igor Letona Biteri, Jose Luis Campo Barandiaran, Inocente Soria Valderrama eta Iñigo Elizegi Erbiti eserraraziko dituzte akusatuen aulkian, ETAren logistika taldeko kide izatea egotzita.

Frantziako Poliziak terrorismo delituak egotzi dizkiete hamaika ustezko ETAkideei. Atxilotuei «taldeterroristako kide» izatea, «ekintza terroristak egiteko» armak eta lehergailuak izatea, autoak lapurtzea, estortsio bidez lortutako dirua erabiltzea eta dokumentazio faltsua egitea leporatu diete.

Iñaki Esparza Luriren kontra daude akusazio gogorrenak. Esparza Luriri hamazazpi urteko kartzela zigorra ezarri zioten2006ko azaroan ETAko zuzendaritza kide izatea eta bestelako egituren koordinazio logistikoaren buru izatea leporatuta. Oraingoan, estortsio delitua egotzi diote, besteak beste; zehazki, ETAren iraultza zerga deiturikoaren kudeatzaile izatea.

Recart, libre dagoen bakarra

Guimon 2003ko urtarrilaren 22an atxilotu zuten Biarnon, Ismael Berasategirekin batera. Guimoni hamazazpi urteko zigorra ezarri diote dagoeneko, Esparza Luriren laguntzaile izateagatik.

Berasategi 2002ko maiatzean espetxeratu zuten lehenengoz, baina Parisko La Sante kartzelatik ihes egin zuen abuztuaren 17an. Bere anaia bisitara joan zitzaionean aldatu egin ziren. Urte berean, Ilarramendi Zabaleta, Sagartzazu Gomez eta Recart atxilotuzituen Poliziak Cahorsen.

Uzkudun Lizadun eta Letona Biteri 2003ko azaroan atxilotu zituzen Poliziak. Letona Biteriri hiru urteko kartzela zigorra ezarri zioten 2006an, «ETAren nazioarteko egiturako kide» izatea leporatuta.

2004ko apirilaren 16an, azkenik, Chatellerauteko etxe batean atzeman zituzten Campo Barandiaran, Soria Valderrama eta Elizegi Erbiti. Elizegi elektronika arloko ustezko burutzat hartu du Poliziak. Barandiaranek, berriz, hamar urteko kartzela zigorra bete behar du dagoeneko Frantzian.

Horrenbestez, bihar epaituko dituzten akusatu guztietatik libre dagoen bakarra, Recart da.

Auzi horretan bertan, beranduago, beste hamaika lagun epaituko ditu Frantziako Auzitegi Bereziak etakide izatea leporatuta. Haien artean, ustezko zuzendaritzako kide Francisco Javier Lopez Peña eta Aitzol Iriondo izango dira. Frantziako Poliziak hain justu atzo atxilotu zuen Iriondo, beste bi ustezko etakiderekin batera.