Ustezko etakide bat atxilotu dute Frantziaren hego-mendebaldean

Lannemezango (Frantzia) udaltzainek ustezko etakide bat atxilotu dute gaur goizean, Frantziaren hego-mendebaldean, Tarbestik gertu. Frantziako Poliziaren arabera, auto bat lapurtzen ari zela atzeman dute.

Alfredo Perez Rubalcaba Espainiako Gobernuaren Barne ministroak esan du atxilotutakoa Pablo Aperribai Bediaga dela, armarik ez zeukala atxiloketaren unean, eta 2005etik dagoela ihes eginda. Basaurikoa (Bizkaia) da eta 37 urte ditu.

Askatasunaren kritika

Askatasuna erakundeak atxilotuaren senideek eta abokatuek haren egoerari buruzko informaziorik ez dutela kritikatu du. "Inkomunikazio egoerak atxilotuaren babes gabeko erabateko egoera eta senitartekoen angustia eta ezinegona sorrarazten ditu".

Frantziako eta Espainiako estatuen jokabidea salatu du, "errepresioa baliatzen dutelako gatazka politikoa eta ondoriozko enfrentamentua hauspotzeko".