Ekainaren 24an atxilotu zituzten Aranalde eta Atorrasagasti. Euskal Iheslari Politikoen Kolektiboko mintzaide da Aranalde. Bi egunera atzeman zuten Zubillaga. Hirurak utzi zituzten libre, Paueko Auzitegiko Instrukzio Ganberak euroagindu eskaera aztertu artean.
Euroaginduen erabilpen politikoa salatu zuten iheslariek iragan ostiralean. Ohartarazi zuten Aranalde, Atorrasagasti eta Zubillagaren kontrako euroagindurik ez zegoela atxilotu zituzten unean, eta gaineratu zuten atxiloketak IEPK-k plazaraturiko bide orriari emandako erantzuna direla.
Hiru iheslarien aurkako eskaerez gain, Ibon Fernandez Iradirena ere aztertzen ari da Paueko Auzitegia. Lannemezango espetxean da Fernandez Iradi.
Mobilizaziorako deia
Bake Bideak antolatuta, iheslarien atxiloketak salatzeko manifestazioa egingo dute uztailaren 20an Baionan, 16:00etan. Herri mobilizazioarekin estatuen blokeo jarrera alda daitekeela dio Bake Bideak.
