Hiru aldeko bilkura izanen da, Seaskak eskatu zuen bezala. Seaskaz gain, Frantziako Hezkuntza, Kultura eta Barne ministerioetako kabineteetako arduradunak izanen dira. Azkenik, Ipar Euskal Herriko diputatu eta senatariek parte hartuko dute. Ez da oraindik zehaztu zeintzuk hartuko duten parte bilkuran, baina bederen diputatu eta senatari sozialistak presente egonen direla adierazi du Collette Capdevielle diputatuak.
Lehen lan bilkura izanen dela zehaztu du Hur Gorostiaga Seaskako zuzendariak. Hendaiako kasuaren haritik, argi gelditu da Falloux legea traba gaindiezina dela. Euskararentzako eta ikastolentzako lege geriza eskatzen du Seaskak. Korapiloa ez da bilkura bakarrean konponduko.
