Urtarrilean hartutako erabakia zehaztu du Frantziako Garraio Ministerioak; uztailaren 1etik aurrera ez da gaueko tren zerbitzurik izango Hendaia eta Paris artean.
CGT sindikatuak erabakia salatu du, eta sinadurak bilduko ditu gobernuak atzera egin dezan. Naiz.eus atariak argitaratu duenez, Peio Dufau sindikatuko kideak azpimarratu du tren horrek goizean goiz Parisen izateko aukera ematen duela eta hura kentzeak "garraiobide kutsakorragoak erabiltzera" behartuko dituela herritarrak.
Sindikatua Hendaiako auzapez Kotte Ezenarrorekin eta PSko diputatu Sylviane Alauxekin batzartu da, gobernuaren erabakiaren aurrean dauden aukerak aztertzeko. Dufauk salatu du argudio ekonomikoak ez duela zentzurik eta zerbitzu publikoa dela: "Dirua irabaztea ez litzateke lehentasuna izan behar".
