Valcalderako sarraskian fusilatutako 52 pertsonen omenezko ekitaldia egin zuten asteazkenean Iruñeko kartzela zaharraren orubean. Kartzelatik atera, eta Valcalderako eremuraino eraman zituzten falangista eta erreketeek, 1936an. Han hil zituzten.
18:00etan hasi zen omenaldia, eta fusilatuetako batzuen senideen testigantzak izan ziren entzungai. Bertan izan zen, besteak beste, Ainhoa Aznarez Nafarroako Legebiltzarreko lehendakaria. Aurreskua dantzatuz eta 52 hildakoen izen-abizenak irakurriz amaitu zen ekitaldia.
Hitza hartu zutenen artean, Juanjo Iberok, fusilatuetako baten senideak, eskerrak eman zizkion Nafarroako Gobernuari eta Iruñeko Udalari, memoria historikoaren alorrean eginiko lanagatik. Halaber, salatu zuen Francisco Franco fundazioa "legezkoa" dela eta diru laguntzak jasotzen dituela: "Bitartean, Altsasuko gazteentzat ia 400 urteko zigorra eskatu dute, taberna liskar batengatik. Hau da dugun justizia".
