Webgunearen atariko sarreran diotenez, Puerto III espetxean dauden euskal presoen batzarrak "gizartearekin harreman zuzena izateko aukera" baliatu nahi dute, "betiere Arantza Zuluetaren egoera aldatzea ardatz harturik". Webguneak ez ei du ordezkatuko EPPK Euskal Preso Politikoen Kolektiboaren ahotsa, ezta presoen alde lanean ari diren elkarteena ere.
Webgunean gogorarazten dutenez, 1991tik aritu da Zulueta abokatu gisa euskal presoen defentsan, eta, duela bi urte eta erdi espetxeratu zutenetik, "bakartze egoera latzenetariko bat" pairatzen ari da: "Inoiz bukatzen ez den mendeku baten moduan, etsaiak Arantza apurtu eta birrindu nahi du, egunerokotasunean bere integritate fisiko eta psikologikoari erasoz".
Webgunearen helbidea Arantza-sos.eus da. Presoen idazkiak, Arantza Zuluetaren soslai biografikoa, haren alde antolatutako mobilizazioen berri eta bestelako edukiak agertzen dira hor. Foro bat ere badago, Ideien meategia izenekoa, herritarrek Zuluetaren egoera aldarazteko proposamenak egin ditzaten.
