ELA, LAB eta EILAS sindikatuek, Ikastolen Elkarteak, Sortzen eta Ikasle Abertzaleak elkarteek, Hik Hasik eta UEUk herritar guztiak deitu dituzte Espainiako Gobernuaren Hezkuntzaren Kalitatea Hobetzeko Lege Organikoaren aurka urratsak egitera. Larunbateko Iruñeko batzar irekia lehendabiziko ekitaldia izanen da. Asmoa da gida bat osatzea, Euskal Herriko hezkuntza sistema propioaren oinarriak eta Jose Ignacio Wert Espainiako Hezkuntza ministroaren erreformaren aurkako estrategiak jasotzeko. Hainbat adituk osatu taldea ere ari da gida hori egiteko lanean. Zirriborroa mahai gainean dago, maiatza bitarte eztabaidatzeko eta lantzeko. Maiatzaren 10ean, hain zuzen ere, Hego Euskal Herrirako jardunaldia eginen dute Altsasun (Nafarroa).
"Jendeak ez du Werten legea nahi", nabarmendu du ELAko Ander Pascualek. Ildo horretan, norbanakoei eta hezkuntza komunitateari konpromisoak eskatu dizkiete eragileek, erreformari ezetz erran eta ez ezartzeko. Ikasleen garapena eta beharrak kontuan hartuko dituen sistemaren alde egin dute, ikasle euskaldun eta eleaniztunak sortuko dituena. Curriculum propioa izateko beharra nabarmendu dute, gainera, eta ikastetxeen autonomia defendatu.
