Erraustegiaren eta zaborren kudeaketaren inguruko eztabaida ez da amaitu; Gipuzkoako Diputazioak galdeketari ezetz esan izanak ez ditu GuraSOSen asmoak bertan behera utzi, eta parte hartze prozesua bere kabuz egitea erabaki du. Horretarako sortu du Hitzartu ekimena. Egitasmoaren helburua da zaborren kudeaketari buruzko erabakia herritarrek eurek hartzea auziari buruzko "hitza hartuz".
"Gizarte zibilak finantzatuko du partaidetza-proiektu osoa, alegia, proiektuan aurreikusitako ekintza guztiak, gure kulturan sustrai sendoak dituen erakunde baten bidez: auzolanaren bidez". Era horretan azaldu dute proiektuaren muina, eta hasi dira lehen urratsak egiten ere dirua bilduz.
GuraSOSeko eledun Joseba Belaustegik azaldu duenez, asmoa ez da agintariei parte hartze prozesu bat egiteko eskatzea, herritarrek eurek hori martxan jartzea baizik. "Herritarrek badituzte baliabideak arazoak konpontzeko edo horiek konpontzen laguntzeko".
