Sei hilabete bete dira Zaldibarko zabortegia hondoratu eta bi langile desagertu zirenetik. Alberto Sololuzeren eta Joaquin Beltranen gorpuak lurpean daude oraindik. Hondamendi hura gogora ekartzeko, «ez ahazteko» eta erantzukizunak eskatzeko, elkarretaratzeetara deitu dute Zallan eta Markinan, gaurko. Elkarretaratzeak herriko plazetan egingo dira, 20:00etan.
Astelehenean ere, Eusko Legebiltzarra osatu zenean, plataformak elkarretaratzea egin zuen Gasteizen, gertatutakoaren inguruko «erantzukizunak» eskatzeko. Eskatu zuten Iñaki Arriolak ardurarik ez izatea eratzear dagoen Jaurlaritza berrian. Izan ere, Ingurumen sailburuaren ardurapean dago hondakinen kudeaketa. «Tragedia humano, ekologiko eta soziala izan zen gertatu zena, eta urte erdia pasatu ondoren erantzukizun politikoak argitu gabe egotea, lotsagarria ez ezik, kalitate demokratiko baxukoa da», Zaldibar Argituren iritziz.
Esan dute oraindik ez dela eman zabortegiaren inguruko irtenbiderik, eta egun beroetan hauts toxikoa ateratzen dela oraindik ere. «Osasun neurriak bermatzea eskatzen diegu erakundeei», gaineratu dute.
Zaldibar Argitu plataformak mural bat ere egin du Zaldibarren: Langileak. Osasuna. Erantzukizunak leloarekin.
