Oskar Matute Alternatibako kidea eta Juan Kruz Aldasoro ezker abertzaleko kidea Zaragozako Unibertsitatean hitzaldia ematekoak ziren atzo iluntzean, baina ezin izan zuten. Eskuindar talde bat joan zen, istiluak sortu ziren entzuleen eta haien artean, Unibertsitateko errektoreak ekitaldia bertan behera utzi zuen, eta Poliziak aretoa hustu zuen azkenean. EH Bilduk jakinarazi du Matute eta Aldasoro onik direla, eta eskerrak eman dizkie hitzaldia antolatu zutenei eta bertaratu zirenei.
AVT biktimen elkarteak unibertsitateko errektoreari eskatu zion, herenegun, hitzaldia bertan behera uzteko. Errektoreak uko egin zion, ordea. Ekonomia Fakultatean egitekoa zen hitzaldia, negoziazioaren eta elkarrizketaren aldeko Zaragozako talde batek antolatutakoa. Euskal Herriko "garai berriaz" hitz egin behar zuten Matutek eta Aldasorok.
Aretora joan ziren, entzuleak ere bai, baina eskuindar talde bat bildu zen kanpoaldean. Entzuleen eta kanpoan zirenen artean istiluak sortu ziren. Aldasoro eta Matute aldameneko gela batera atera zituzten. Azkenerako, errektoreak ekitaldia bertan behera utzi zuen, eta Poliziak lekua hustu zuen. Hitzaldia hasi aurretik, eskuindarrek errektoreari eta haren taldeari irain egin ziotela azaldu zuen errektoreak berak, Manuel Lopezek.
Hitzaldia entzutera joandako pertsona talde batek unibertsitatea utzi zuen, baina eskuindar talde batek jarraitu egin zien, eta obretarako materialekin eraso egin zieten. Atzetik, Espainiako Poliziak identifikatu egin zituen; hogei bat lagun zirela azaldu zuten poliziek. Hitzaldia debekatzeko ohiuka elkartu ziren eskuindarrak ere identifikatu zituztela eta 60 bat izan zirela adierazi zuen Poliziak.
Adierazpen askatasunaren eta bizikidetza bakean edukitzearen alde hitz egin du Oskar Matutek, prentsarentzat, hitzaldia eten eta gero. Juan Kruz Aldasorok, berriz, iraganean egindako akatsei buruz gogoeta egin behar dela esan du, etorkizunean pentsatzen hasteko.
