Eusko Jaurlaritzako Zirkulazio Zuzendaritzak atzo adierazi zuenez, 500.000 auto inguruk erabiliko dituzte Araba, Gipuzkoa eta Bizkaiko errepideak igandera bitartean, oporretan joan edo oporretan etortzeko gehienek. Irteera operazioaren lehen zatia atzo zen, eta bihar gauerdira arte iraungo du. Bigarrena, berriz, datorren asteko asteazkenetik larunbatera egingo da.
Eusko Jaurlaritzako Herrizaingo Sailak antolaketa berezia eta baliabide gehiago erabiliko ditu egunotan, «istripuen kopurua gutxitzeko eta errepideetako auto zirkulazioa arindu eta ibilgailuen pilaketak saihesteko».
Eusko Jaurlaritzak autoen mugimenduei buruzko informazio panelak jarri ditu A-68 autobidean. Zirkulazioa kontrolatzeko, 20 telebista kamera jarri dituzte.
Zirkulazio Zuzendaritzak debeku bereziak jarri ditu indarrean produktu arriskutsuak garraiatzen dituzten kamioientzat: datorren asteko ostegunean (uztailaren 31) eta ostiralean (abuztuaren 1a), 08:00etatik gauerdira arte. Bestetik, salbuespen berezirik ez da kamioientzat, 7,5 tonatik gorako zama daramatenentzat soilik.
Lerro hauek idazteko orduan, ez zen istripu larririk gertatu Euskal Herriko errepideetan, baina lehen auto pilaketak sortzen ari ziren A-8 autobidean, Barakaldo eta Bilbo parean (Gurutzetako ospitaletik Malmasineraino), bi istripuren eta auto kopuru handiaren ondorioz. Biriatun ere hiru kilometro inguruko auto ilara sortu zen arratsaldeko 20:00 aldera.
Atzoko istripurik larriena Gasteizen gertatu zen. A-3601 errepidean, auto batek eta kamioi batek aurrez aurre jo zuten, eta autoko bidaiari bat, 54 urteko J.P.S. emakumea, Txagorritxuko ospitalera eraman zuten, larri zaurituta. Zauritua autoaren barruan harrapatuta geratu zen, eta Gasteizko suhiltzaileek atera behar izan zuten. >
