Zazpi gizon atxilotu dituzte genero indarkeriagatik

Zazpi gizon atxilotu dituzte Ertzaintzak eta Gasteizko eta Bilboko udaltzainek asteburuan. Gasteizen 26 eta 47 urte arteko lau gizon atzeman zituzten igandean, Barakaldon, egun berean, 19 urteko bat eta 26 urteko beste bat atxilotu zituzten, eta beste atxiloketa Bilbon gertatu zen, ostiralean; 29 urte zituen atxilotuak, eta onartu egin zuen genero indarkeriako delitua.

Atxiloketen artean, Gasteizko udaltzainek kasu bat nabarmendudute, atxilotu baten autoan arma bat atzeman zutelako. Izatez jaurtigairik gabeko arma zela nabarmendu du Udaltzaingoak, baina tiro egin ahal izateko manipulatuta zegoela gaineratu du. Mehatxuak, eraso egitea eta su arma izatea leporatuta atxilotu zuten igandean, 19:00etan. 35 urte ditu gizon horrek.

Auto barruan eztabaidan ari ziren gizona eta emakumea udaltzainak bertaratu zirenean. Emakumeak jakinarazi zien duela gutxi banatu zirela, eta gizonak eraso egin ziola etxeko giltzak berreskuratu ahal izateko. Poliziek gizonaren autoa arakatu eta arma aurkitu zuten; hala, aipatutako delituak egotzita, polizia etxera eraman zuten.

Atxiloketa hori gertatu zen orduan gutxi gorabehera, 47 urteko gizon bat atxilo hartu zuen GasteizkoUdaltzaingoak Lakua-Arriaga auzoan. Emakume baten deiari erantzunez, harengana joan ziren udaltzainak. Senarrak mehatxatu eta iraindu egin zuela jakinarazi zien poliziei. Dibortziatzeko prozesuan zeudela azaldu zien poliziei, eta deitu zienean gizona etxean zegoela. Gizonaren bila joan zirenean modu erasokorrean jokatu zuela nabarmendu zuten udaltzainek, eta polizia bat jo ere egin zuela gaineratu dute.

Igande goizean beste bi gizon atxilotu zituen Udaltzaingoak Gasteizen. Babesgabetuen Andre Mariaren plazaren inguruko etxebizitza batean izan zen atxiloketetako bat, bertan gertatutako eraso baten berri izan ostean. Emakumeak ezpaina odoletan zuen udaltzainak heldu zirenean, Gasteizko Udalak jakinarazi duenez. Emakumearen adierazpenak entzun ostean, etxean bertan zegoen 26 urteko gizona atxilotu zuten. Emakumeak ez zuen salakerarik jarri, Poliziak jakinarazitakoaren arabera.

Eztabaida batean bikotekidea «astintzeagatik eta bultzatzeagatik» atxilo hartu zuten udaltzainek 33 urteko beste gizon bat. Erasoaren biktimak gertatutakoaren berri eman zien poliziei goizeko zortzietan. Emakumea «beldurtuta» zegoela jakinarazi dute harengana joan ziren udaltzainek; ordea, gizona atxilotu zutenean ez zuela salaketarik jarrigaineratu dute.

Erasoak, kalean bertan

Barakaldon bi gizon atxilotu zituen Ertzaintzak igandean, eta biak kalean egindako erasoen ondorioz gertatu ziren. Goizeko zazpiak aldera gertatu zen lehena, eta bertako bizilagunen deiei erantzunez bertaratu ziren ertzainak. Emakumeak hainbat ubeldura zituen, eta bikotekidearen erasoen ondorioz zituela jakinarazi zuen, Herrizaingo Sailak azaldutakoaren arabera. Ustezko erasotzailea bertan zegoen, eta polizia etxera eraman zuten.

Gaueko bederatziak alderagertatu zen beste atxiloketa, Gurutzeta inguruan. Kasu horretan ertzainek ikusi egin zuten erasoa; gizonak emakumeari lepotik heldu eta lekutik «indarra erabiliz» urruntzen saiatzen ari zela heldu zen Polizia bertara. Elkarrengandik urrundu ostean, gizona polizia etxera eraman zuten, genero indarkeriako delitua leporatuta.

Azkenik, bere buruari errua egotzi zion gizon bat atxilotu zuen Bilboko Udaltzaingoak ostiralean, arratsaldeko ordu biak aldera. 29 urteko gizon batek «tratu txar emaile zikin bat» zela eta atxilotzea merezi zuela esan ziela jakinarazi dute atxiloketa egin zuten poliziek.

Emakumea, iletik helduta, auto barrura bultzatzen ari zela heldu ziren udaltzainak. Gizona gelditu zutenean eztabaida bat izan zutela eta eraso egin ziola aitortu zuen. Emakumeak zehaztu zuen auto barruan ere eraso egin ziola. 23 urteko emakumeak udaltzainei jakinarazi zien duela bost hilabete inguru hasitako harremana mozteko gelditua zegoela gizonarekin. Bide batez, aurretikere eraso egin ziola gaineratu zuen emakumeak eta azkena duela hilabete izan zela zehaztu zuen.