22 eta 26 urte bitartean dituzte akusatuek, eta, Iruñeko Udalak jakinarazi duenez, Udaltzaingoak diligentziak bidali ditu epaitegira. Apirilaren 17 goizaldekoak dira gertakariak. Egun hartan, ehun bat lagunek Aste Santuko prozesio baten itxurak egin zituzten alde zaharrean zehar, eta Frantzisko aita santuaren irudia zeramaten. Irudiari su eman zioten ondoren.
Udaltzaingoak itzali zituen garrak, eta hamar lagun identifikatu zituen handik gertu. Horietatik zazpiri "sentimendu erlijiosoaren" kontrako delitu bat egitea egotzi diete.
