Andoni Zengotitabengoa Elorrioko presoak eta bere familiak bizi duen "salbuespenezko egoera" salatzeko eskaera eraman du gaur haren sendiak Eusko Legebiltzarrera. Iera Abadiano euskal presoaren bikotekidea, Iñaki Goioaga abokatua eta Haizea Barandiaran psikologoa Giza Eskubideen Batzordean izan dira, euskal presoak bizi duen egoera azaldu eta legebiltzarrari "laguntza" eskatzeko. Izan ere, Zengotitabengoak bost urte daramatza Lisboako Monsanto espetxean, Portugalek segurtasun gorenerako duen kartzelan. Bizi-baldintza gogorrak ditu, muturrekoak, eta ia ezinezkoa du familiarekin harrema mantentzea. Eta ez presoari berari soilik, baita bikotekideari, eta dituzten bi alabei ere eskubideak urratzen zaizkiela salatu dute. Abadianok kontatu duenez, urtean behin du presoak bere alabak besarkatzeko aukera, baina metro bat eta hogei zentimetroko garaieran dago bisiten gelako kristala, eta altuera horren parekoa denez alaba batena, aita ikusi ezinik ibiltzen da. Alaba nagusienak psikoterapiaren beharra dauka, eta medikuek aitarekin kontaktu gehiago izatea gomendatu dutela azaldu du, berriz, psikologoak.
Presoa segurtasun goreneko kartzelan izatea "krudela" dela eta familiari "sufrimendua" eragiten diola salatu du bikotekideak. Hala, legebiltzarrari eskatu dio urratsak egin ditzala familiaren eskubideak errespetatuak izan daitezen, besteak beste, Zengotitabengoa espetxe erregimena aldatzeko eskaera eginez.
Iñaki Goiaga presoaren abokatuak, berriz, egoera juridikoaren berri eman du. Jakinarazi duenez, bete beharreko zigor bakar eta larriena Portugalen ezarri diotena da. Izan ere, Espainian ezarritako zigorrak preskribatuta daude. Hori hala, segurtasun goreneko espetxean egoteko "inolako elementu objektiborik" ez dagoela adierazi du.
