Zigor handia jaso du Francois Hollande Frantziako presidentearen alderdi PSk departamendu bozetan; orain arte 60 Kontseilu Nagusik zuten PSko presidente bat, baina, lehen datuen arabera, litekeena da kopuru hori 27-31ra murriztea.
Eskuin muturreko Fronte Nazionalak, berriz, hauteskundeotan berretsi du frantziako jokaleku politikoa hiru alderdi nagusiren artean banatuta dagoela, baina Marine Le Penen alderdiak ez du ezein departamendutan irabazi, bitan gailentzeko helburua bazuen ere.
UMPren buruzagitzara itzulita, 2017ko Frantziako presidentetzarako bidean garaipen garrantzitsua lortu du Nicolas Sarkozyk. Lehen emaitzen berri izan ostean, Sarkozyk nabarmendu du frantziarrek "ezezko masiboa" eman dietela Hollanderen politikei, eta erantsi "garai berri bat" zabaldu dela.
Manuel Valls lehen ministroak, berriz, UMPren garaipena aitortu du. Ohartarazi du ekonomia alorrean hartutako neurrien norabidean jarraituko duela gobernuak, baina ñabartuz "frantziarren ahotsa" entzun duela.
Parte hartzea %50 ingurukoa izan da; lehen itzulia baino apur bat urriagoa.
