EAE-ANVk 43 alkatetza ditu, 24 gehiengo osoarekin eta 19 gehiengo sinplearekin. Zentsura mozioak aurkeztea posible litzatekeen udal horien artean, Soraluzen bakarrik osatzen dute gehiengo osoa EAJk, PSE-EEk eta PPk, oraingoz zentsura mozioak babesteko prest agertu diren hiru alderdiek. 11 hautetsiko udal honetan, alkatea eta beste bi hautetsi baino ez ditu EAE-ANVk, eta sei hautetsi dituzte EAJren (3), PSE-EEren (2) eta PPren (1) artean. EAko bi zinegotzien ezezkoarekin ere, beraz, mozioak aurrera egingo luke eta EAJko alkatea izango luke berriro Soraluzek.
Baina salbuespena da. Zentsura mozioaren proposamenak gehiengoaren babesa lortzeko aukera izan dezakeen beste bost udaletatik lautan EBko hautetsien botoa beharko dute, EAE-ANVri alkatetza kentzeko. Eta, jakina denez, tokian tokiko herri batzarrek erabakiko dute EBko zinegotziek nola jokatuko duten, EBko zuzendaritzak esaten duena esaten duela. Izan ere, EBko zuzendaritzak Arrasateko zentsura mozioa sostengatzearen alde egin du, baina Arrasateko EBk kontrako iritzia du. Jarrera horri eutsiz gero, Ino Galparsororen aurkako zentsura mozioak ez du aurrera egingo.
Antzeko atakan izango dira Legazpiko, Pasaiako eta Villabonako EBko hautetsiak, EAJk edota PSE-EEk zentsura mozioak aurkezten badituzte herri horietan. EB-Aralar koalizioaren zerrendan aukeratu zituzten zinegotzi, baina EBkoak dira guztiak, Legazpiko independente bat salbu.
Pasaian, Arrasaten bezala, PSE-EEri dagokio ekimena hartzea, eta PSE-EEkoa litzateke alkate berria, mozioak aurrera eginez gero. Baina bederatzi hautetsiren sostengua beharko dute horretarako, eta baten faltan izango dira PSE-EE (5), EAJ (2) eta PP (1). Ezker Batuak luke azken hitza, EAk bezala zinegotzi bat duenez.
Legazpin eta Villabonan EAJri dagokio ekimena hartzea eta, mozioak arrakasta izanez gero, alkatetza hartzea, baina zazpi hautetsiren babesa beharko dute horretarako, bietan. Legazpin bost dituzte EAJk (3) eta PSE-EEk (2), eta EB alderdiko zinegotziaren babesa ez ezik, EB-Aralar zerrendako beste hautetsiaren sostengua ere beharko lukete, eta hau ez da ez EBkoa ez Aralarrekoa, independentea baizik. Villabonan, aldiz, sei osatzen dituzte EAJk (5) eta PSE-EEk (1), eta EBko bakarrarena izango da azken erabakia, zentsura moziorik aurkezten baldin badute.
Zentsura mozioak teorian aurrera egiteko aukera izan dezakeen beste herrian, Antzuolan, Zutik-eko bi zinegotziena izango da azken hitza, EB-Aralar-Zutik koalizioan aurkeztuagatik alderdi horretakoak baitira biak. Hauen botorik gabe, lau baino ez dituzte izango EAJk (3) eta PSE-EEk (1), eta sei beharko dituzte.
EA-REN ETA ARALARREN BEHARRA. EAE-ANVk gehiengo sinplearekin agintzen duen beste udal gehienetan zentsura mozioek ez daukate aurrera egiterik, EAko eta Aralarreko hautetsiek jarreraz aldatzen ez badute behintzat. Izan ere, zentsura mozioa aurkeztea posible litzatekeen hemeretzi herrietatik bederatzitan derrigorrezkoa da EAko eta Aralarreko zinegotzien babesa, edo bietako batena behintzat: Azpeitia, Bera, Bergara, Eskoriatza, Gautegiz Arteaga, Hernani, Urretxu, Usurbil eta Zestoa daude egoera horretan.
Azpeitian, Beran, Gautegiz Arteagan eta Zestoan EAJ bakarrik egongo litzateke zentsura mozioaren defentsan, ez PSE-EEk, ez PPk ez EBk ordezkaritzarik ez baitute udal horietan. Azpeitian, EAJko zortziek EAren (2) nahiz Aralarren (1) babesa beharko lukete, biak gobernu taldean daudenean, EAE-ANVrekin (6). Beran ere EAren (3) eta Aralarren (2) laguntza beharko luke EAJk, bi zinegotzi izanik lau falta baitzaizkio gehiengo osorako. Zestoan eta Gautegiz Arteagan giltza EAk du, EAE-ANVz eta EAJz gain, ordezkaritza duen alderdi bakarra baita, bi hautetsirekin Zestoan eta bakarrarekin Arteagan.
Bergaran, Eskoriatzan, Hernanin, Urretxun eta Usurbilen ere kontuak ez zaizkie ateratzen zentsura mozioa aurkeztu nahi luketenei. Bergaran bederatzi boto behar dira gehiengo osorako eta, EAJk (5) eta PSE-EEk (2) zazpi osatzen dituztenez, Aralarren hirurak erabakigarriak dira. Eskoriatzan sei hautetsi behar dira gehiengo osorako, eta EAko bi hautetsien sostengurik gabe ezinezkoa izango da, EBko (1) eta hautagaitza independenteko (1) hautetsiek EAJrekin (2) eta PSE-EErekin (1) bat eginda ere.
Hernanin oposizio osoak bat egin beharko luke: bederatzi boto beharko lituzkete, baina EAk bi zinegotzi dituenez, hauen ezezkoa aski da ekimena bertan behera gelditzeko, EBko zinegotziak egiten duena egiten duela. Usurbilen ere zentsura mozioa oposizio osoak bultzatu beharko luke, baina EAJk eta PSE-EEk hautetsi bana besterik ez dute, EAk (3) eta Aralarrek (2) baino gutxiago. Urretxun zazpi boto behar dira gehiengo osorako eta, EBko hautetsiak zentsura mozioaren alde egingo balu ere, baten faltan izango lirateke PSE-EE (3) eta EAJ (2), EAko hiruek babestuko ez dutenez.
INDEPENDENTEEN ESKU. Beste lau herritan, Elorrion, Igorren, Belauntzan eta Larraunen, hautagaitza independenteen esku legoke zentsura mozioak aurkeztea edo ez.
Elorrion, Elorrioko Herritarren Aukera (EHA) hautagaitza independenteko hautetsiaren botoa beharko dute EAJk (5) eta PSE-EEk (1) gehiengo osoa osatzeko, baina nekez lortuko dute, hain zuzen ere EHAko zinegotziaren botoa ere jaso baitzuen Niko Morenok, EAE-ANVko seiez gain, alkate aukeratu zutenean.
Antzeko egoeran daude Igorren ere: Igorre Danontzat (ID) zerrendako bi zinegotziren babesari esker du alkatetza EAE-ANVk, lau zinegotzirekin bigarren indarra den arren.
Belauntzan eta Larraunen oso bestelakoa da egoera: zentsura mozioak aurkezteko asmoa duten alderdiek ez dute batere hautetsirik, eta hautagaitza independenteek nekez hartuko dute zentsura mozioak aurkezteko ekimena.
EAE-ANV-ren aLKaTeTzaK, GeHIenGo sInPLeareKIn
BizkaiaElorrio
EAE-ANV6
EAJ5
PSE-EE1
EHA 1
Giltza: EHA
Gautegiz Arteaga
EAE-ANV 3
EAJ 3
EA 1
Giltza: EA
Igorre
EAJ5
EAE-ANV4
Igorre Danontzat2
Giltza: ID
Gipuzkoa
Antzuola
EAE-ANV5
EAJ3
EB-Aralar-Zutik2
PSE-EE1
Giltza: Zutik
Arrasate
EAE-ANV7
PSE-EE4
EAJ4
EB-Zutik3
Aralar1
PP1
EA1
Giltza: EB eta Zutik
Azpeitia
EAJ8
EAE-ANV6
EA2
EB-Aralar 1
Giltza: EA eta Aralar
Belauntza
ANV3
Lagun Artean2
Danok Bat2
Giltza: Independenteak
Bergara
EAE-ANV6
EAJ5
Aralar3
PSE-EE2
EA1
Giltza: Aralar
Eskoriatza
EAE-ANV4
EAJ2
EA2
Elizateak1
PSE-EE1
EB-Aralar1
Giltza: EA
Hernani
EAE-ANV8
PSE3
EAJ2
EA2
PP1
EB-Aralar1
Giltza: EA eta EB
Legazpi
EAE-ANV3
EAJ3
EA3
PSE-EE2
EB-Aralar2
Giltza: EA edo EB
Pasaia
EAE-ANV7
PSE-EE5
EAJ2
PP1
EA 1
EB-Aralar1
Giltza: EA edo EB
Soraluze
EAE-ANV3
EAJ3
PSE-EE2
EA2
PP1
Giltza: EAJ, PSE eta PP
Urretxu
EAE-ANV4
PSE-EE 3
EA3
EAJ2
EB-Aralar1
Giltza: EA
Usurbil
EAE-ANV6
EA3
Aralar2
EAJ 1
PSE-EE1
Giltza: EA eta Aralar
Villabona
EAE-ANV6
EAJ5
PSE-EE1
EB-Aralar1
Giltza: EB
Zestoa
EAE-ANV5
EAJ4
EA2
Giltza: EA
NAFARROA
Bera
EAE-ANV4
EA3
Aralar2
EAJ2
Giltza: EA eta Aralar
Larraun
Larraundarrak3
Larraungo Elkartea3
EAE-ANV2
Aralar1
Giltza: Independenteak
