Donostiak bere burua zezenketen aurkako hiritzat jo dezan, horri buruz bete beharreko galdeketa bat egiteko eskatu zuten ehunka lagunek herenegun Donostian. Donostia Antitaurina Orain! plataformak antolatu zuen protesta. Agiri bat egin du gaiari buruz, eta atxikimenduak biltzeari ekin dio.
Zezenketak badira aurten ere Donostiako Aste Nagusian, nahiz eta programa ofizialetik kanpora utzi dituzten. Zezenketak bai, eta protestak ere bai, azken urteetan ohiko bilakatu denez. Deitzaileen iritzian, donostiarrek ez dituzte nahi zezenketak. «Ez dugu zezenketak desagertzeko soilik eskatzen; Donostiak bere burua zezenketen aurkako hiritzat jotzea nahi dugu», adierazi zuten. Hala, proposamena egin diote udalari, galdeketa bat egiteko. Nabarmendu zuten bidegabea dela zezenek pairatzen duten tratua. «Bada ordua zezenek sufritzeari utz diezaioten eta animalia guztiek errespetua izan dezaten».
Plataformak onartu du ez dela bideragarri zezenketak datorren urtea baino lehen bertan behera uztea, 2012rako kontratazio batzuk dagoeneko eginda baitaude.
Beste hiru protesta Bilbon
Bulebarrean hasi eta amaitu zuten martxa, Eusko Jaurlaritzako Herrizaingo Sailak besterik agindu bazuen ere. Jaietan oztopo zela esanda, ibilbidea aldatzea nahi zuen Jaurlaritzak, baina auzitegiak Bulebarretik abiatzeko baimena eman zion plataformari.
Bilboko Aste Nagusian ere izango dira zezenketak. Baita protestak ere: hilaren 20rako, 26rako eta 27rako egin dituzte deialdiak.
Zezenketen kontra, protesta egin dute Donostian
Hiritarrek zezenketarik ez dutela nahi esan dute Donostia Antitaurina Orain! taldeko kideek, eta galdeketa bat eskatu
Iruzkinak
Ez dago iruzkinik
Ordenatu
