Bizkaiko 29 urteko emakume bat —L.G.B.—hilda aurkitu dute Castro Urdialesen (Espainia), arma zauriak dituela, Espainiako Gobernuak Kantabrian duen Ordezkaritzak jakinarazi duenez. Industrialde bateko pabiloi batean topatu dute gorpua, 15:00ak aldera. Guardia Zibila gertaera ikertzen ari da.
Euskadi Irratiak esan du Zierbenako bizilaguna zela emakumea.
Espainiako Ordezkaritzak dio lehen datuen arabera emakumeak ez zuela tratu txarrengatik salaketarik aurkeztu. Oraingoz, baztertu egin du hilketa genero indarkeriaren ondorioz gertatu dela.
Hilotza aurkitu eta pixka batera mutil gazte bat urkatuta topatu dute bere etxean, Castron, eta ikerketako iturriek esan dute balitekeela hura izatea hiltzailea. Emakumearen familiarentzat lan egiten zuen gizonezkoak, eta sexu erasoengatik aurrekariak zituela adierazi dute polizia iturriek.
Kantabrian dago Castro, Bizkaitik kilometro gutxira.
