Ertzaintzak Donostiako alde zaharreko zortzi pertsona identifikatu ditu gaur, hiriko hamabost gazte auziperatuen aldeko kartelak jartzea eta euskal presoen irudiak eramatea egotzita. Lekukoek BERRIAri jakinarazi diotenez, presoen irudiak modu txarrean kendu dizkiete elkartutakoei.
11:30 aldera, lau pertsona aritu dira Sortuk gazte auziperatuen alde eginiko kartelak jartzen. Ertzaintzak jarraitu ditu, eta idenfikatu egin dituzte. Gainera, kendu egin dituzte kartelak.
12:55 aldera, berriz, Bretxan identifikatu dituzte beste lau herritar. Larunbatero elkarretaratzea egin ohi dute leku horretan, eta gaurkoan poliziak joan zaizkie, presoen irudiak zeramatzaten pertsonak identifikatzeko agindua zutela esanaz. Lekukoen arabera, modu txarrean joan zaizkie poliziak, eta argazki bat lurrera bota dute. Presoen irudiak eraman dituzte ertzainek.
