Mattin Sarasolak 2008an torturapean egindako deklarazioak oinarri hartuta, urtebete lehenago izandako leherketa batean parte hartzea egozten diote Joseba Iturbide nafarrari. Madrilen ari dira hura epaitzen, eta zortzi urteko kartzela zigorra eskatu du fiskalak bere aurka.
2007an 500 kilo lehergailu zeramatzan autokarabana bat zartarazi zuten Cuevas de Vinroma herrian. Akusazioaren arabera, Marina d'Or hirian (Valentzia, Herrialde Katalanak) atentatu bat egiteko erabili behar zuten ibilgailua, baina herritar batek Guardia Zibilari deitu zion, eta segurtasun indarrek ezer susmagarririk nabaritu ez arren, hura beste toki batean zartaraztea erabaki zuten.
Fiskalaren arabera, Iturbidek Sarasolari lagundu zion autokarabana eramaten eta baita hura zartarazten ere. Ordea, Lesakakoak ukatu egin du halakorik, eta adierazi du 2011an sartu zela bera ETAn, eta beraz, leherketa izan zen urtean ez zela erakundeko kide.
