Bilboko Otxarkoaga auzoko bikotearen hilketarekin zerikusia dutelakoan atxilotutako hiru adingabeetako bik Bizkaiko adingabeen fiskalaren aurrean deklaratu dute gaur, bigarren aldiz. Hilketaren ustezko egilea da horietako bat; 14 urte ditu, eta Zumarragako zentroan da astelehenaz geroztik. Bigarren adingabeak, berriz, 16 urte ditu, eta hildako bikotearen etxetik gertu bizi da, Otxarkoagan bertan. Deustuko ertzain etxean igaro du gaua, eta fiskalaren aurretik pasatu da gaur berriz ere. Deklarazio horien ostean, hain zuzen, Zumarragako adingabeen zentrora bidali du hura ere.
Ertzaintzak ez du oraindik itxitzat eman ikerketa. Atzo bertan, miaketak egin zituzten gaztetxoen etxeetan, Otxarkoagan, haiek bertan zirela. Bizkaiko adingabeen fiskalak jakinarazi du adingabeen zentroen ikuskatzeak areagotu dituela.
