Bizkaiko Abokatuen Bazkundean hitz egin dute aste honetan Guardia Zibilaren miaketa jasan behar izan duten abokatuek. Alfonso Zenonek salatu du "benetako astakeriak" egin ditueztela polizia operazio honetan, eta Iñaki Goioagak gaineratu du "marra gorri guztiak" gainditu dituztela. Inputatutako abokatuen bulegoetan sartzeaz gain, besteen bulegoetan ere sartu da Guardia Zibila, eta handik "informazio delikatua" eraman dutela, tartean, Zenonek azaldu dutenez, GALi buruzkoa.
Iñaki Goioagak esan du "xake mate" egin diotela Zuzenbide Estatuari. "Marra gorri guztiak gainditu dituzte... Lehenik eta behin, operazio honek jazarpen ideologikoa du ardatz". Jakinarazi du, gainera, azken egunetan lokalizatzeko moduan izan dela, eta berak ez duela ikerketarik oztopatu. Zentzu horretan azken egunetan zenbait hedabidek zabaldu duten informazioa kritikatu du.
Abokatu bezala bere jarduna egiteko eskubidea defendatu du Amaiurreko senatariak: "Nire ustez, egin didaten miaketa legez kanpokoa da eta ez dut onartu, horregatik ez dut parte hartu halako batean". Alfonso Zenonek salatu duenez, beste bi atxiloketa egiteko asmoa zeukan Guardia Zibilak. Frankismoko TOP Tribunal de Orden Publico zelakoa ekarri du gogora Iñaki Goioagak.
