ELIKADURA. Esnearen eta haragiaren mineral maila jaitsi egin da 60 urtean

Esneak eta haragiak duela 60 urte baino askoz mineral kopuru txikiagoa dute egun, Erresuma Batuan eginiko ikerketa baten arabera. Erresuma Batuan elikagaien kalitatea zaintzen duen Elikagai Batzordeak bultzatu du ikerketa, eta emaitzak Food aldizkarian argitaratu zituzten atzo. 1940. urteko datuak 2002koekin alderatu dituzte ikertzaileek. Haragiaren kasuan, burdina mailak %17 egin du behera, batez beste (xerretan, %55), eta magnesioaren %7 galdu da. Esnearen mineral mailak %60 egin du behera. Esneak kaltzioaren %2 galdu du, eta magnesioaren %21. Parmesano gaztak magnesioaren eta burdinaren %70 galdu du. Fenomenoa nekazaritzan eta industrian ezarritako ekoizpen intentsiboaren ondorioa dela adierazi dute ikertzaileek.