100. garaipenak konfiantza eta Kopa ekarriko lituzke

Eskura du. Bilbo Basketek etxeko lanak ondo egiten baditu, egina dauka. Etxeko lanak, bi aldetatik. Etxean jokatuko dituen bi partidak irabazi eta etxeko lanak oro har. Alegia, asteazkenean Menorcan jokatuko duen norgehiagoka ere irabaztea, Menorca Bilbokoa baino talde apalagoa baita. Pausoz pauso, Estudiantes da Miribillara bisitan datorren lehena, eta haiei irabaztea komeni, ondorengo kalkuluetan pentsatzen hasi aurretik.

Estudiantes ez baita Bartzelona eta Baskonia bezain indartsua, baina bi talde horiei irabazteko gai izan baita. Hori bai, bere kantxan. Tentuz jardun beharko du Katsikarisen taldeak, Madrilgo taldea nekez belaunikatzen den horietakoa baita. Talde osatua dauka, gainera, bi jokalarirekin postuko, eta etxetik urrun eskas samar ari badira ere, neurketa estua espero da Miribillan.

Talde ona duelako, eta Estudiantes bera Kopan sartzeko borrokan sartu delako astelehenean Baskonia menderatu ostean. Madrildarrek lan zaila dute oso, baina aukera, eduki, badute, eta duten bitartean ez dute etsiko. Lehen itzulia bukatzeko falta diren hiru partidak irabazi behar ditu Luis Casimiroren taldeak, 9-8 balantzea lortzeko. Hala balitz, puntuen balantzeak erabakiko luke, Kopa jokatuko duten edo ez.

Bilbon, bitartean, Bartzelonak eragindako zauriak osatzen egin dute astea. Mina egin zuen kataluniarren aurkako porrotak, baina airean doan ligan ez dago atsekaberako tarterik, eta ez dagoenetik ere ondorio baikorrak atera behar dira. Hala egin dute jokalariek: Bartzelona menderatzeko aukera eduki izana goretsi dute, eta haien aurka egindako joko ona baliagarria izango da gaur, Estudiantesi irabazteko.

Partida trabatua espero da, bi taldeek defentsa zorrotzean oinarritzen baitute bere jokoa. Besoak asko erabiltzen dituzte bi taldeek, pase lerroak oztopatzeko asmoarekin, eta litekeena da partida 65-70 puntutan mugitzea. Gauzak horrela, Katsikarisek garrantzitsutzat jo du jaurtiketa portzentaje ona izatea, eta Estudiantesen saskiratze errazak saihestea. Entrenatzaileak Mavroeidis eta Hernandez-Sonseca erakutsitako hobekuntzari eustea espero du, «Estudiantesek pibot mugikorrak eta indartsuak ditu eta».

BIZKAIA BB-ESTUDIANTES

Txapelketa. ACB ligako 15. jardunaldia.

Bizkaia Bilbo Basket. Javi Rodriguez, Aaron Jackson, Josh Fischer, Blums, Vasileiadis, Warren, Mumbru, Banic, Hervelle, Mavroeidis eta Hernandez-Sonseca.

Estudiantes. Oliver, Jayson Granger, Sergio Sanchez, Ty Ellis, Welsch, Pancho Jasen, Caner-Medley, German Gabriel, Josh Asselin eta Daniel Clark.

Sailkapena. Bizkaia Bilbo Basket 7. postuan dago: 7-7 (+39); Estudiantes 13. da: 6-8 (-28).

Tokia. Bilbo Arena (8.500 ikusle).

Ordua. 20:00.