Espainiako Poliziak aipatuz Efe agentziak zabaldu duenez, Neptuno deitu diote operazioari, eta 32 lagun atxilotu dituzte azaroaren 30eko gertakarien harira, Madrilen eta inguruko probintzietan. Horien artean leudeke Francisco Jose Romero Deportivoko zalea hil zutenak.
Frente Atletico eta Riazor Blues talde ultretako 200 bat lagun nahastu ziren liskarretan. Romero Manzanares ibaira bota zuten, eta larrialdi zerbitzuek ospitalera eraman zuten, oso larri. Hipotermia eta bihotzekoa izan zituen, eta ospitalean hil zen -43 urte zituen-. Gutxienez beste 12 lagun zauritu ziren.
