ABF ligako lau euskal taldeek gaur arratsaldean jokatuko dute

Bera Berak, Kukullagak, Zuazok eta Itxakok partida garrantzitsuak dituzte gaur arratsaldean. Denboraldia aurrera doan heinean, taldeek gero eta argiago dauzkate euren helburuak. Jokatzen lehena Zuazo izango da (18:00). Bizkaiko taldeak Leoni egin beharko dio bisita, eta azken jardunaldian etxean lorturiko garaipenari segida eman nahiko dio. Kukullaga Mar Alacanten kantxan ariko da (19:00) sailkapeneko lehenengo postuetatik gertu jarraitzeko intentzioarekin. Mecaliaren aurka 23-31 galdu ostean, aurkari zuzen baten etxean irabazteko asmoa dute bizkaitarrek.

Bera Berak partida polita du Elxen aurka (19:30). Donostiarrek ez dute partidarik galdu, eta sailkapeneko lidergoa dute helburu. Oso partida zaila daukate, aurkari zuzena delako Elx: sailkapeneko hirugarren postuan daude espainiarrak. Bestalde, sailkapeneko azken postuetatik ahalik eta azkarren ihes egitea dute helburu Itxakoko jokalariek. Denboraldi-aurreko diru arazoak tarteko, sasoia ez dute ondo hasi nafarrek, eta joan den asteko garaipena salbu, ez dute emaitza onik lortu. Mecaliaren aurka jokatuko dute nafarrek (20:00); galiziarrak sailkapeneko lehen postuetako borrokan sartuta daude.

Anaitasuna-Palma Rio, gaur

Anaitasunak denboraldiko lehen garaipena lortu nahi du gaur arratsaldean, Palma Rio aurkari zuzenaren kontra (19:00). Iruindarrekin batera Asobal ligako azken postuetako lehian sartuta dago Palma Rio; partida bat irabazi eta bost galdu dituzte lehen sei jardunaldietan.

Orain astebete berdinketarekin etsi behar izan zuten nafarrek Valladoliden aurka —29-29—, eta aukera paregabea galdu zuten azken sailkatuaren aurka kolpea emateko. Gaurkoan, bigarren finala jokatuko du Iruñeko taldeak. Goizegi da partidak horrela definitzeko, baina etxeko norgehiagokak irabazi gabe jarraitzen badu, zailtasun handiak izango ditu Anaitasunak hurrengo denboraldian Asobal ligan egon ahal izateko.