Alavesek beste final bat jokatuko du gaur Castelloren kontra, etxean

Alavesek Castello hartuko du gaur Mendizorrotzan. Puntuen premia bizia du Alavesek, jaisteko postuetan sartuta baitago. Gainera, goiko postuetako taldeak pixkanaka aldentzen doaz. Realaren aurka irabazi zuen azkenekoz, etxean, otsailaren 28an. Bolada txar hori eteten saiatuko da gaur. Castello sailkapeneko erdialdean dago, goiko eta beheko postuetatik aldenduta. Gainera, bi hilabete daramatza etxetik kanpo partidarik irabazi gabe. Halere, Javi Lopez, Alaveseko entrenatzailea, ez da fidatzen: «Castellok jokalari bikainak ditu. Sailkapeneko goiko postuetan egon da sarri, eta horrek zerbait esan nahi du».

Alavesen hamaikakoari dagokionez, Edu Albacarrek eta Almironek ezingo dute jokatu, zigortuta baitaude. Ondorioz, Javi Lopezek aldaketak egin beharko ditu ezker hegal osoan. Kalderonek jokatuko du atzealdeko ezker hegalean. Almironek eskuin hegalean jokatuko du, eta Cesar eta Casar ariko dira erdian. Zelai erdian, berriz, Moreno ariko da ezkerraldean. Cuevasek jokatuko du eskuinaldean. Astudillok izango du jokoa antolatzeko ardura. Haren ondoan Garrok edo Emiliok jokatuko du, azken hori bere lesiotik osatzen bada. Javi Guerra eta Juanjo izango dira aurrelariak.

Castellori dagokionez, Paco Herrera entrenatzaileak ezingo ditu hasierako hamaikakoan zelairatu Pedro Hernandez, Gari Uranga eta Pepe Mora. Carlos Sanchezek eta Leonardo Ulloak, berriz, partida bateko zigorra bete dute eta hasieratik ariko dira. Sergio Mantecon eta Arana osatu egin dira, baina bigarrenak bakarrik jokatuko du hasieratik.



ALAVES-CASTELLO

Alaves. Bernardo; Almiron, Cesar, Casar, Kalderon; Cuevas, Astudillo, Emilio, Moreno;Javi Guerra eta Juanjo.

Castello. Carlos Sanchez; Rafita, Pol, Zamora, Baigorri; Dealbert, Lopez Garai; Arana, Mario, Victor Salas; eta Ulloa.

Epailea. Ontanaya Lopez.

Lekua. Mendizorrotza futbol zelaia (19.840 eserleku).

Ordua. 18:00etan.