Alaveseko zale bat baino gehiagori kontrako eztarritik sartuko zitzaion bazkaria euren taldeak Getafen (Espainia) egindako partida ikusita. Oso gaizki aritu da Gianni de Biasik entrenatutako taldea, eta Getafetik punturen batekin itzultzeko aukera txikiena ere ez du izan. Hasi eta berehala jarri zaio maldan gora neurketa, Markel Bergarak etxekoen lehen gola sartu baitu bosgarren minutuan, buruz. Kolpe gogorra izan da, baina txikia hiru minutu geroago gertatu denarekin alderatuta. Izan ere, Rodrigo Elyk penaltia egin dio Jorge Molinari, eta aurrelariak bigarren gola sartu du.
De Biasik aldaketak egin ditu bigarren zati hasieran, baina alferrik. Angelek hirugarren gola sartu du 52. minutuan, eta erabakita utzi du norgehiagoka. Gol horrek erabat jota utzi du Alaves, eta Angelek berak ederki aprobetxatu du hamar minutu geroago laugarren gola sartzeko. Arabarrek ez dute suspertzeko gaitasunik erakutsi. Gol bat sartu dute, Christian Santosek, 81. minutuan, baina berandu zen jada.
Neurketa amaieran, oso haserre mintzatu da Alaveseko entrenatzailea. “Lotsa eman dit egin dugun lanak. Ez dugu ezer ulertu horrela jokatuta mailari eutsi nahi badiogu”, esan du De Biasik.
